నేను కూడా మేధావినే ..... దయచేసి ఒప్పుకోండి.

బ్లాగోకంలో  ఆమధ్యన కొందరు నేను మహా మేధావిని, కాదంటే కోస్తా బిడ్డా, భ్యుహహ్హ” అని  సవాల్ చేసారు.   ఇంకొందరు నేను లెజండు నే , కాదనే ధైర్యం ఉన్నవాళ్ళు  నా ముందుకు రండి. మీ సంగతి తేలుస్తాఅని తొడ గొట్టేరు.   లెజండులు, మహా మేధావులు మధ్య తేడా నాకు తెలియదు. వారి స్థాయికి ఎదగ లేక పోయినా కనీసం మేధావి అనే నా అనిపించు కోవాలని కోరిక మొదలయింది. దురద ప్రారంభమయింది. జాలిం లోషన్లు పని చెయ్యలేదు. నెత్తి మీద జుట్టు, మూతి మీద మీసం లేవు కానీ నాకేం తక్కువ అని ధైర్యం చెప్పుకున్నానుకోరికయితే ప్రజ్వలిస్తోంది కానీ మేధావి ననిపించు కోవడం ఎలా  అనే అనుమానం పొడచూపింది.

మేధావి అనగా ఎవరూ అని గూగులయ్యని   అడిగాను.  43,000 results in 0.25 sec. అన్నాడు. అవి చదివే ఓపిక, సమయం లేకపోయాయి. నిఘంటువుని అడిగానుచిలుక, మేధ కలవాడు, A wit, సూక్ష్మ బుద్ధి కలవాడు, ధీమంతుడు  అని చెప్పింది. చిలుక అన్న అర్ధం నాకు నచ్చిందినాలాగే చాలా మంది చిలుకలు బ్లాగోకం లో వీర విహారం చేస్తున్నాయి ముఖ్యం గా కామెంట్ల విభాగం లో. టపా కెవ్వు, కేక . సూపర్, అద్భుతం, brilliant, చాలా బాగుంది ఇత్యాదులు  చిలుక పలుకుల  కామెంట్లు  పెట్టేస్తుంటాము.  ఎవరు ఏమి వ్రాసినా అంతే.  నిఘంటువు ప్రకారం మేధావులయినా,  చిలుకల్ని  మేధావులుగా ఎవరూ  గుర్తించరు.  Wit  అనగా హాస్యం, చమత్కారం అని నిఘంటువు అర్ధం చెబుతుంది  కానీ    బ్లాగుల్లో హాస్యం వ్రాసే వాళ్ళని జోకర్స్ గానే చూస్తారు కానీ మేధావులు గా పరిగణించరు.   ఇంకేమి  చేయవలె అని ఆలోచించాను.

అసలు  ఎన్ని రకాల మేధావులు ఉన్నారు, వారి గుణ గణములు ఏమి అని తెలుసుకొన గోరి   బ్లాగోకాన్ని క్షుణ్ణంగా, నిశితంగా పరిశీలించాను. చాలా మంది మేధావులు అనుచర గణాలతో బ్లాగోకం లో తమ ఉనికి ని చాటుకుంటూ విహరిస్తున్నారు. ఆశ్చర్యమాశ్చర్యము,  ఎందరో మహానుభావులు  అందరికీ వందనములు. అందరిని కాకపోయినా కొందరు మేధావులను హృదయారవిందమున  చూచి బ్రహ్మానంద మనుభవించానుఏదో ఒక రకం మేధావిని  అని అనిపించుకునే అవకాశాలు కనిపించాయి.

బ్లాగోకం లో నాకు బాగా నచ్చిన వారు సినీ మేధావులు. మొదటి ఆట చూసేసి వెంటనే, నేనా సినిమా చూసేసానోచ్ అంటూ సమీక్షలు వ్రాసేవారు ఒక రకం మేధావులు. సినిమా కధతో పాటు దర్శకుడి ప్రతిభను వర్ణిస్తూ, కెమేరా మేన్ కన్నుల్లోంచి కుంగిపోతున్న ఆకాశాన్నిఎగిసి పడుతున్న అలల్ని చూసి వహ్వ అంటూ ఆనంద పారవశ్యం చెందుతారు. ఫోటోగ్రఫి ని శ్లాఘిస్తూ, సహజత్వాన్ని కన్నులకు కట్టినట్టు భారీ సెట్టింగ్లకి రూపకల్పన చేసిన కళా దర్శకుడిని నుతిస్తూ, పాత రాగాలనే కొత్త బాణీ లతో కాపీ కొట్టినట్టు కూడా తెలియకుండా దరువుల ధ్వని లో సాహిత్యానికి మంగళం పాడేసిన సంగీత దర్శకుడి ని ఆకాశానికి ఎత్తేస్తూ, సాహిత్య మధనం చేసి  హాలాహలాన్ని  సృష్టించిన పాటల, మాటల రచయితలకు  జేజే లు పలుకుతూ ఇట్టే వ్రాసి పాడేస్తారు సమీక్ష.  నిర్మాత ఖర్చుపెట్టిన ప్రతీ పైసా వసూలు అవుతుందని ఢంకా మోగించి మరీ చెప్పేస్తారు. కొంతమంది సినీ మేధావులకి అంతగా ఏది నచ్చదు.  “ఇటువంటి సినిమాలు ఎందుకు తీస్తారో అర్ధం కాదు. కధ లేదు, దర్శకుడికి ఎలా చెప్పాలో తెలియదు, ఈ సంగీత దర్శకుడికి అసలు స్వరజ్ఞానమే లేదు”  అంటూ ఏకేస్తారు. మరి  కొందరు మొహమాటానికి పోయి,  “ఒక మాటు చూడవచ్చు ఫరవాలేదు రెండు మూడు మాట్లు చూడఖ్ఖర్లేదు” అంటూ సన్నాయి నొక్కులు నొక్కుతారుసమీక్షకుడి అభిప్రాయాలు అతని స్వంత ఇష్టా ఇష్టాల మీద ఎక్కువుగా ఆధారపడి ఉంటాయి. అంటే అతని అభిమాన నటుడు, దర్శకుడు, మొదలైన వారి సినిమాలైతే ఆహా అంటారు లేకపోతె పెదవి విరిచేయ వచ్చుఈ సమీక్షల్లో ఒక ప్రామాణికత వెతకడం దండుగ. ఈ అభిప్రాయం నేను చెప్పిన తరువాత నేను సినీ మేధావిని కాలేను అని తేలిపోయింది

దొరికిన కూరగాయ నైనా, ఆకు కూరనైనా అనేక రకములైన చిత్ర హింసలకు గురిచేస్తూ దేశి పద్ధతుల్లో విదేశీ మసాలాలు కూరి కొంగొత్త పేర్లతో ఆవిష్కరించి, అందంగా అలంకరించి కూర ఏదో,  అలంకారం ఏదో కూడా తెలియకుండా వండి పాడేసే మేధావులు ఇంకో రకంసాధారణం గా ఈ వంటల్లో విదేశీ వాసనలు  ఎక్కువుగా గుప్పిస్తారు.   కొత్తి మీరా, పసుపు, చింతపండు, అల్లం మొదలైనవి వాడరు. టామరిన్, టర్మెరిక్, కొరైండర్  ఇత్యాదులు ఎక్కువుగా వాడుతారు.  బ్రింజాలు, లేడీఫింగరు, మేంగో కాయ,     మూంగ్ దాలు, చెనా దాలు లు ఉపయోగిస్తారు. ఇవన్నీ ఉపయోగించి కూడా ఆంధ్రా వంటకం అంటారు. పక్కవాడికి తినిపించిన తరువాతే తిను బిడ్డా అనే హెచ్చెరిక తో  పాటు (కడుపు మంట) జఠరాగ్నిని   రగిల్చేవారు కొందరుఅరటి కాయ తో  అరవై రకాలు అంటూ అరటి హల్వా, అరటి పులావ్, అరటి చట్నీ, అరటి పువ్వు కూర , అరటి దూట చట్ని   అంటూ అరటి పురాణం వ్రాసేస్తారు. మొన్న మిగిలిన చట్నీనినిన్న మిగిలిన కూరని,  ఈ వేళ సాంబారు గా మార్చి    మీ ఆయన నోట్లో పోయడం  ఎలా అంటూ క్లాసులు తీసుకుంటారు.  భీమ బలులు దమయంతి నాధులు  కూడా వంటల టపాలు  వేసేస్తారు. తినడమే కానీ వండడం అసలు రాని నేను ఈ రంగం లో పనికి రాను

ఆ తోట ఆ తోపు ఆకు పచ్చని గూడు
ఆవంక గోరువంక ఎన్నో ఉన్నాయిలే
మా ఊరి గుడి పైన మసలి వచ్చే ఓ మేఘమాలా
మా పెరటి దవనాల వాసన వెదజల్లి పోవా

అంటూ పాడుకుంటూ, మా ఊరు, మా నేల, మా గాలి, మా నింగి అని నిట్టూరుస్తూ నోస్టాల్జియా లో కూరుకు పోయే మేధావులు మరి కొందరు. స్వ ప్రదేశ భ్రాంతి అనండి, ఇంటిపై చింత అనండి,  వీరు ఒక కంట విషాదం మరో కంట ఆనందం ఒలికిస్తూ గత స్మృతుల్లోకి జారిపోతారు.  చిన్నతనం లో  వారింటికి వచ్చి ఉత్తరాలు ఇచ్చే తపాలా మనిషి, వాళ్ళ ఇంటి చాకలి, పనిమనిషి  కూడా వాళ్ళ భ్రాంతి కారకులే. గుళ్ళో ప్రసాదం దగ్గరనుంచి వాళ్ళ అమ్మమ్మ గారు చేసిన చింతకాయ పచ్చడి దాకా, బళ్ళో మాష్టారు చెప్పిన పాఠాల దగ్గర నుంచి పక్కింటి దుర్గా భవాని పెళ్ళి ముచ్చట్ల దాకా, పక్కింటి జామకాయల దగ్గర నుంచి కరణం గారి తోటలో దొంగతనం గా కోసుకున్న మామిడికాయల దాకా ఎన్నెన్నో ముచ్చట్లు,  కావేవీ నోస్టాల్జియా కనర్హం. ఈ రకం మేధావులు బహుశా గుంపులు గుంపులు గా తిరుగుతారేమో. ఒకరు ఒక టపా పెట్టగానేమాతాత గారి పిలక అంటూ నో, మా మామ మీసం అంటూ నో, మా ఊరి చెరువులో తామర పూలు అంటూ నో  మిగతా మేధావులు వాలిపోతారు. నా కిలాంటి జ్ఞాపకాలు లేవు. అందుకని ఈ మార్గం కూడా మూసుకొని పోయింది.

సంగీత మేధావులు, రాజకీయ మేధావులు, పుస్తకాలు కొనుక్కొనే మేధావులు, చదివిన పుస్తకాల మీద సమీక్ష లు వ్రాసే మేధావులు ఇల్లా ఇంకా చాలా రకాల మేధావులు చిరు నవ్వులు చిందిస్తూ కలయ తిరుగుతున్నారు. ఈ రంగాలలో నేను జ్ఞానశూన్యుడను కాబట్టి  వారితో చేరే సాహసం చేయలేను.   ఇక్కడ కొంచెం వివరణ అవసరం అనుకుంటాను.  పుస్తక ప్రదర్సన లలో  కొన్న పుస్తకాలు ఓ పాతికో ముఫ్ఫైయ్యో ఫోటో తీసి మరీ బ్లాగులో పెట్టేస్తారు. నాకు గుండె ఆగిపోతుంది అది చదివి, చూసి . వారసత్వంగా భోషాణంతో సహా సంక్రమించిన గ్రంధాలు తప్ప నేను నా జీవితకాలంలో కొన్న పుస్తకాలేవీ లేవు. అంటేకొన్నవి లేవూ అని.  మా ఇన్స్టిట్యూట్ లో లైబ్రరి కమిటీ చైర్ మన్ గా ఉన్న కాలం లో చాలా స్పష్టం గా చెప్పాను మా వాళ్లకిపాతిక  ముప్ఫై వేల కి ఎప్పుడూ  అప్రూవల్  కి పెట్టకండి, నా గుండె ఆగి పోతుంది. రోజుకి  ఒక ఏడెనిమిది వేల కి పెట్టండి, కావాల్సి వస్తే రోజూ పెట్టుకోండి అని చెప్పాను. ఇంతకీ,  ఇందులో కూడా నేను రికమెండేడ్  ఫర్ అప్రూవల్ అని సంతకం పెట్టడమే. నా పై వాడే సాంక్షన్ చేసేవాడు.  దానికే నా గుండె డ్ఢాం  అనేది.

పండిత ప్రకాండులు, కవి పుంగవుల గ్రూపు లో చేరి పండిత మేధావి అనిపించుకుందాం అని ప్రయత్నించాను. సమస్యా పూరణం  ఒకటి రెండు మాట్లు ప్రయత్నించాను. అబ్బే కుదరలేదు ఎంత ప్రయత్నించినా. ఓ శాలువా కూడా కొనుక్కున్నాను గుంపులో జేరిపోదామని,   కానీ ఎవరైనా గుర్తుపట్టి,   కుపండితా  కోడిన్ దినె భూసురుండు సురలోకాంగనాలింగనా మైమరపునన్”,  పూరించు  అంటే నా గతేం కావాలి అని ఊరుకున్నాను. కానీ ఎప్పటికైనా ఓ సమస్య పూరించ లేక పోతానా, కామెంటు పెట్టక పోతానా? చూద్దాం. కానీ ప్రస్థుతానికి ఇది అయ్యేపని కాదు.

అప్పుడప్పుడు  బుర్ర లోని గుజ్జు ని తుంగలో తొక్కి నార తీసి నెలకి ఒక టపా వేసుకొనే నాలాంటి జోకర్ కి  ఎప్పటికీ మేధావిని అనిపించు కునే భాగ్యం లేదా అని విచారించాను. కోరిక వదిలేద్దామను కున్నప్పుడల్లా దురద ఎక్కువయి పోయేది.  అరువు తెచ్చుకొనితిరిగి ఇవ్వకుండా, అప్పుడప్పుడు  పుస్తకాలు చదువుతావు కదాఓ సమీక్ష వ్రాసి పడేయి”  అని సలహా ఇచ్చింది అర్ధాంగి.

సరే నని  కొన్ని పుస్తక సమీక్షలు జాగ్రత్తగా చదివాను. అబ్బే అర్ధం కాలేదు. వీళ్ళు నిజం గా మేధావులే అనుకున్నాను. లైను కి లైను కి మధ్య నిగూఢార్ధాలు  వెతకడం మన చేత కాని  పని. పుస్తకాలు చదివినా, వాటిలోని పాత్రల మనస్థత్వాన్ని అంచనా వేయడం మన వల్ల కాదు. కధ, కధనం, శైలి లాంటివి మనకి కొరుకుడు పడవుచదివిన తరువాత బుర్ర పెట్టి ఆలోచించడం అలవాటు లేదుఏం చెయ్యాలి అని మళ్ళీ  ఆలోచించాను.  వెను వెంటనే  బుర్రలో కిరసనాయిలు దీపం వెలిగింది. చిన్నప్పుడు  స్కూల్లో వ్రాసిన వ్యాసం గుర్తుకు వచ్చింది. ధర్మ రాజు వ్యక్తిత్వము ను వర్ణింపుము? సుయోధనుని స్వభావము విశదీకరింపుము? 15  మార్కుల ప్రశ్న లు. కనీసం ఒక పేజీ వ్రాయకపోతే మేష్టారు ఒప్పుకొనే వారు కాదు. ఒక పేజీ వ్రాస్తే 5,6 మార్కులు , రెండు పేజీలు వ్రాస్తే    10,11 మార్కులు ఇచ్చేవారు. అంతకన్నా మా క్లాసు లో  ఎప్పుడు ఎక్కువ రాలేదు. ఇవి వ్రాసేటప్పుడు నా బుద్ధి వికసించేది, తెలివి అత్యున్నత స్థాయి కి వెళ్లి పోయేది.

ధర్మరాజు శాంతమూర్తి. మృదు స్వభావి. ధర్మాధర్మ విచక్షణ కలవాడు అందుకనే అతనిని ధర్మరాజు అనేవారు. అసలు పేరు యుధిష్టరుడు. అతను భీమార్జున నకుల సహదేవులకు అన్నగారు. వారు ఇతని సోదరులు. భీమార్జునులు మహా బలవంతులైనను ఇతని చెప్పుచేతలలో ఉండెడివారు. అన్నగారనిన వారికి  అనురాగము,  ప్రేమ, వాత్సల్యము మెండుగా  యుండెడివి. ఇంత ప్రేమ బడయుట అతని వ్యక్తిత్వము వల్లనే కదా. ఇంత గొప్ప వ్యక్తిత్వము గల ధర్మరాజునకు జూదమాడుట యందు కడు నాశక్తి. జూదమాడినను ధర్మమును వదిలెడు వాడు కాదు. ధర్మ జూదమే ఆడెడివాడు. జూదమనగా ఆ కాలమున పాచికలతో నాడెడి వారు. నేటి పేకాటలు నాడు బహుశా ఉండిఉండవు. ధర్మరాజు పేకాట ఆడినట్టు ఎక్కడా వ్రాయబడలేదు. పాచికలతోనే ఆడెడి వాడు అని  భారతములో లిఖింప బడినది. ధర్మరాజు  జూద గృహములలో జూదమాడెడి వాడు కాదు. రాజ్య సభల్లోనే నాడెడి వాడు. ఇది అతని వ్యక్తిత్వము లోని ఔన్నత్యమును సూచించు చున్నది కదా.

ఈ విధంగా ఒక పేజిన్నర వ్రాసేసేవాడిని. కానీ మా తెలుగు మాష్టారు వ్రాయుటలో నా వ్యక్తిత్వమును సహింప జాలక 3,4  మార్కులు మాత్రమే వేసెడి వారు. దానికే నేను సంతోషించెడి  వాడను. ఏవిషయం మీదనైనా రెండు పేజీలు వ్రాయ గలను అనే ధైర్యం వచ్చింది.  బుర్ర పెట్టకుండా చదివినా, అర్ధం అయిపోయే పుస్తకాలు ఏమీ అని  సూక్ష్మ బుద్ధితో శోధించానుమూడు పుస్తకాలు నా దృష్టికి వచ్చాయి

1. భారతీయ రైల్వే టైం టేబుల్
2. టెలిఫోన్ డైరక్టరి
3. గంటల పంచాంగం

మొదటి  రెండు పుస్తకాలు ఇప్పుడు ఎక్కువగా ఉపయోగం లో లేవుఏ రైలు ఎక్కడుందో కూడా అంతర్జాలం లో  తెలిసి పోతోంది. మొబైల్ ఫోన్ల లో కావాల్సిన నంబర్లు అన్నీ నిక్షిప్తం చేసుకుంటున్నారుకాబట్టి వాటి మీద సమీక్ష వ్రాసినా ఎవరూ  చదవరు.  గంటల పంచాంగం ఉపయోగం చాలా ఉంది. ఇప్పుడు ఇది చాలా విస్తృతం గా ఉపయోగిస్తున్నారు.  కాబట్టి గంటల పంచాంగం మీదే సమీక్ష వ్రాయాలని నిర్ణయించుకున్నాను. దీని కోసం నలుగురు దైవజ్ఞులు చే విరచించ బడిన  నాలుగు పంచాంగాలు చదివాను. నా సమీక్ష మీరు చదవండి

గంటల పంచాగం వల్ల అనేకానేక ఉపయోగములు కలవు.   దశమి వెళ్లి ఏకాదశి ఎప్పుడు వస్తుందో ఇట్టే తెలుసు కోవచ్చు. ఇంగ్లిష్ కేలండర్లలో లేని  ఎన్నో తెలుగు పండగలు ఇందులో ఉంటాయి.
  
ఈ వేళ గంగావతరణం శుభదిన సందర్భంగా వ్రతం చేసుకుంటున్నాను కాబట్టి  ఈ రోజు నాకు శలవు ప్రసాదించండి” 

అని పై అధికారిని శలవు అడుగ వచ్చు. ప్రయాణానికి మనమే ముహుర్తములు పెట్టుకోవచ్చు. తారా బలం మొదలైనవి మనమే గుణించేసు కోవచ్చు. అన్నిటి కన్నా ముఖ్యమైనది మీ రాశి ఫలాలు తెలుసు కోవచ్చుఏ నెలలో ఏ ()శుభములు  గలుగునో ముందుగానే తెలుసుకొని ఆ ప్రకారము మన కార్యములు జయప్రదం గా నెరవేర్చుకొన వచ్చునువివాహాది శుభ కార్యక్రమములకు  ముహూర్తములు కూడా పంచాగము లో ఇవ్వబడును. పెద్దగా పట్టింపు లేనిచో పెట్టుడు ముహూర్తములు మనమే పెట్టుకొన వచ్చు.

పంచాంగం ఇంటిలో ఉంటే ఇంకా చాలా చాలా మంచి విషయాలు తెలుస్తాయి

రాత్రి పరుండు నపుడు  రుద్రాక్ష మాల కంఠమందుండ రాదు.
పెరుగును రాత్రి యందు భుజింప రాదు.
సాయంత్రం వేళ వీధి తలుపులు మూసి యుంచరాదు.

ఇత్యాదులు తెలుసుకొన వచ్చును. పంటలు, వర్షాలు, గ్రహణాలు మొదలైన వాటి  గురించి  అవగాహన కలిగించు కోవచ్చుఅబ్బే మాకు వీటి మీద అభిరుచి లేదంటారా , ఫరవాలేదు. గంటల పంచాంగం లో ప్రార్ధనా శ్లోకాలు ఉంటాయి. ఉదయం లేవగానే పఠించ వలసినవి, మద్యాహ్నం చదువు కోవలసినవి, రాత్రి పరుండు సమయమున ప్రార్ధించ వలసినవి మొదలగు నవి కూడా ఉంటాయి .

ఇన్ని పంచాగాలు చదివాను  కదా? తేడా ఏమైనా ఉందా? ఉంది. పేజీ నంబర్లు మారుతాయి. ఒక దాంట్లో  కందాయ ఫలాలు 10   పేజిలో ఉంటే మరోదాంట్లో 22  పేజిలో ఉండవచ్చు. ఒక్కొక్కప్పుడు ముహూర్తములు కూడా మారవచ్చును. ఉదా. // ఒక దాంట్లో,  చవితి . . 4-45  అని ఉంటేఇంకోదాంట్లో 4-53  అని, మరొక దాంట్లో 5-08  అని కూడా ఉండవచ్చు. అనగా ఒకో ముహూర్తం ఒకో పంచాంగం ప్రకారం ఒక 15-20  నిమిషాలు తేడాగా ఉండే అవకాశాలు ఉన్నాయేమో నని పించింది నాకు. పెళ్ళైన తరువాత మొగుడు దుర్ముహుర్తంలో తాళి కట్టానేమో నని విచారించ వలసిన పని లేదు. ఏదో ఒక పంచాంగం ప్రకారం అది సుముహుర్తమే. అయినను, విజ్ఞుల మాట ప్రకారం, వివాహమునకు సాధారణం గా స్త్రీ రత్నమునకు ఏ ముహుర్తమైనా సుముహుర్తమే, పురుషరాయికి ఏ ముహుర్తమైనను దుర్ముహుర్తమే.   

ఇచట నుండి స్త్రీ రత్నములు చదువ రాదని  మనవి. పురుష పుంగవులే  చదవ వలెను. పెళ్ళైన మగవారికి స్త్రీ రత్న జాతక ప్రభావము అధికముగా నుండవచ్చు.  ఇది నా స్వానుభవము. ఒకరోజున నేను ఇంటికి వచ్చే టప్పటికి ప్రభావతి కూని రాగములు తీయుచు, బహు సంతోషముగా నుంది దేవి కేలా  ఈ ఆనందము అని విచారించానుగంటల పంచాంగములో బల్లి శాస్త్రము గురించి కూడా వ్రాస్తారుఆ పేజీ తీసి ఒక లైన్ ఆవిడ ఘట్టిగా చదివింది . బాహువుల యందు భూషణ ప్రాప్తి అని. నేను తేలికగా తీసి పాడేసాను. కానీ ప్రభావతి ధైర్య సాహసాలు ప్రదర్శించి ఆ మాటను నిజం చేసింది. ఆ రోజునుంచి మా ఇంట్లో పాములు,  తేళ్ళని  యధేచ్చగా సంచరించ నిచ్చేవాడిని కానీ బల్లి కనిపిస్తే సంహరించేవాడిని. మా యావిడ నాకన్ననూ అనేక రెట్లు తెలివైనదని గ్రహించ వలసి వచ్చింది. రోజు రోజూ  నా జాతకము భాగించి తన జాతకము ను గుణించి  ఈ  రోజు పంచాంగం ప్రకారము,  వినోదం అని ఉంది కాబట్టి  సినిమాకి వెళ్ళాలి అనేది. ఈ రోజు విందు భోజనం అని హోటల్ కి తీసుకెళ్ళేది. నేను గంటల పంచాగం కొనడం మానేసాను. ఆవిడ కొనడం మొదలు పెట్టింది. ఇటువంటి దుర్ముహూర్తపు ఘడియలు మీకున్నూ దాపురించే అవకాశం కలదని హెచ్చరించు చున్నాను.

గమనిక : మీరు కోరినచో ఈ  సమీక్ష  ను ఇంకో నాలుగు పేజీ లకు పొడిగించ గలను. మీ అభిప్రాయమును తెలియ పర్చుడు. కామెంటు పెట్టి నేను మేధావినే అని దయ చేసి  ఒప్పుకోండికామెంటు బాక్స్ కు వెళ్ళడానికి ముహూర్తం చూడ నఖ్ఖర్లేదు. అక్కడి దాకా వెళ్ళక పొతే రాహు కాలాలు, దుర్ముహుర్తాలు, వర్జ్యం  అన్నీ మిమ్మల్ని చుట్టుముట్టేస్తాయి. బహు పరాక్.

ఇది సరదాగా వ్రాసినదే. ఎవరినీ ఉద్దేశించి కాదు అని మనవి చేసుకుంటున్నాను.  ఈ రచన  ఎవరికైనా కష్టం కలిగిస్తే  పెద్దమనసు తో క్షమించెయ్యండి అని కోరుతున్నాను.  

అన్నట్టు మరో విషయం.  నన్నొక పుస్తక సమీక్ష వ్రాయమని అడిగి, పుస్తక సమీక్ష తో కూడిన ఈ  రచన  ని చదివి  తగు సవరణలు చేసిన  కొత్తావకాయ గారికి కృతజ్ఞతలు, ధన్యవాదాలు. 


గమనిక:- ఈ టపా మొదటి మాటు ఈ బ్లాగులో 02/05/2012 న ప్రచురించ బడినది.  


47 కామెంట్‌లు:

అజ్ఞాత చెప్పారు...

నేను స్త్రీరత్నాన్నే అయినా మీ పోస్ట్ మొత్తంగా చదివేసా :)) మా ఇంట్లో కూడా గంటల పంచాగం వెంటనే కొని పెట్టుకోవాలి.
మీరు మేధావి అని, ఇంకా మాట్లాడితే మహా మేధావి అని ఒప్పేసుకుంటున్నా. దయచేసి మీ సమీక్షను నాలుగో, ప్ఫదో పేజీలకు వెంటనే పొడిగించండి.

అజ్ఞాత చెప్పారు...

కెవ్వ్వ్వ్వ్ కేక. పంచాంగాలు నిషేధించాలి!!! మం.హా

మాలా కుమార్ చెప్పారు...

మీరు మేధావులు కాకపోవటమేమిటండీ ? గంటల పంచాంగం గురించి ఇంతబాగా మీకన్నా ఇంకెవరు వివరించగలరు . మీరు ముమ్మాటికీ మేధావే .

Ruth చెప్పారు...

హ హ హ .... సూపరంతే !!!
నేను కూడా ఈ నాస్టాల్జియా మేధావులను తెగ చదివి, ఓ ఇదైపోతుంటాను.... నాకెందుకు లేవుచెప్మా ఇలాంటి ఙాపకాలు అని!! కాకపోతే ఆ పుస్తకాల సమీక్షల దగ్గరే, మరే నెను కూడా ఒకటో అరో రాసాను మరి :(
ఇక మీ గంటల పంచాంగం సమీక్ష చాలా బాగుంది. మీరు ఇలాగే త్వరలో టెలిఫోను డైరెక్టరీనీ, రైల్వే టైం టేబుల్ ని కూడా సమీక్షించాలని కోరుకుంటూ.....

పి.ఎస్: అన్ని మేధావుల గురించి రాసారు కాని, నాలా సినిమాలు చూడకపోయినా సమీక్షలు చదివేవాళ్ళూ, వంటలు వండకపోయినా వంటల బ్లాగులు తెగ ఫాలో అయ్యేవాళ్ళూ, నాస్టాల్గియా బ్లాగులకి బ్రహ్మరధం పట్టే వాళ్ళూ.... వీళ్ళు అసలు మేధావులు కారంటారా???

anrd చెప్పారు...

సర్ ! ఈ సమీక్షను మరిన్ని పేజీలకు పొడిగించండి. మీరు మేధావి కాకపోవటమేమిటండి. మీరు మేధావి అని అందరూ ఒప్పుకుంటారు.

buddhamurali చెప్పారు...

సమీక్షలు చదివి సినిమాలకు వెళ్ళే వారి సంగతి నాకు తెలియదు కానీ నేను మాత్రం చాలా కాలం నుంచి సినిమాలకు వెళ్ళడం లేదు సమీక్షలు చదువుతున్నా ...

Madhav Kandalie చెప్పారు...

ఈ టపా చదివిన తరువాత మీరు మేధావి అని ఒప్పుకోక తప్పదు. గంటల పంచాంగం మీద సమీక్ష వ్రాసిన తొట్ట తొలి వ్యక్తి గా మీరు బ్లాగు చరిత్ర పుటలకెక్కడం ఖాయం.

Mohanavamshi చెప్పారు...

మీరు మహా మేధావులు
గంటల పంచాంగము మీద సమీక్ష రాసిన మహా మహా మేధావులు
రైల్వే సమయ సూచి ప్య్ సమీక్ష రాయగలిగిన మహా వీర మేధావుల్

రసజ్ఞ చెప్పారు...

ఇదంతా చదివాక నాకెందుకో మీ కంటే ప్రభావతిగారే మేధావిలా అనిపిస్తున్నారే :) అంటే మీరు కాదని కాదు కానీ ఆవిడ కొంచెం ఎక్కువ అనమాట. మీరిలానే క్యాలెండరు అనే అంశం మీద కూడా ఒక టపా వ్రాసేసి ప్రభావతి గారికన్నా ఎక్కువ మేధావి అని నిరూపించుకోవాలని కోరుకుంటున్నాను :):)

SHANKAR.S చెప్పారు...

గురువుగారూ గంటల పంచాంగం మీద సమీక్ష రాసిన మేధావిగా మీరు చరిత్రలో నిలిచిపోతారు. మీ స్ఫూర్తితో మీ శిష్యుడిగా నేను కూడా ఎక్కాలపుస్తకం మీద సమీక్ష రాయాలనుకుంటున్నాను. ఆశీర్వదించండి.

అజ్ఞాత చెప్పారు...

" కామెంటు పెట్టి నేను మేధావినని దయచేసి ఒప్పుకోండి..." ఛస్తామా, అలా పాయింట్ బ్లాంక్ గా అడిగితే... కానీయండి, ఇదో కొత్త పధ్ధతీ....

Ranjith చెప్పారు...

స్త్రీరత్నం, పురుషరాయి ఈ బాషా ప్రయెగం చాలండి, మీరు మెదావులు అని ఒప్పెసుకుంటున్నాం.

అజ్ఞాత చెప్పారు...

ఇంతమంది మేతావుల మధ్యన ఉన్న మీరు కూడా మేధావే...

ప్రడుమ్న్యుడు అలయాస్ మేధావనిరావు

గంటల పంచాంగం మీద సమీక్ష సూపర్..

అజ్ఞాత చెప్పారు...

మాంచి ముహూర్తం చూసుకుని బ్లాగ్‌లోకం మొత్తాన్నీ ఏకిపారేశారుగా... మీరు మేధావి కాదండీ మహా మేధావి కదా... దహా

అజ్ఞాత చెప్పారు...

మాంచి ముహూర్తం చూసుకుని బ్లాగ్‌లోకం మొత్తాన్నీ ఏకిపారేశారుగా... మీరు మేధావి కాదండీ మహా మేధావి కదా... దహా

Padmarpita చెప్పారు...

మీరు మేధావి కాదండి
:-)
;-)
మహామేధావి..హ హ హ

అజ్ఞాత చెప్పారు...

గులువుగాలూ మేతావంతే మీలు కాదు.., నేను !
నేను గులువుని మించిన చిచ్యున్ని
కాదు కాదు
గులువుని ముంచిన చిచ్యున్ని
అలాంతి నా కంతే పెద్ద మేదావి ఎవలుంతాలు ?
మీలు నిజంగా మేతావే అయితే
మీలు నిజంగా నాకు గులువుగాలు అయ్యే తెలివితేతలు ఉంతే
నేనెవలో చెప్పుకోండి చూద్దాం
ఇత్లు
మీ మహావీల.., వీలాధివీల..,
మహావీలాధివీల వీల మాల్తాండ కవికోకిల !
కత మాతలు పాతలు చిత్లానువాదం బొమ్మలు చిత్లాలు విచిత్లాలూ దల్శకత్వం ప్లదల్శకత్వం నిల్మాత నతుడు నతి నతానుభవులు నత చేకల నత తాల్వభౌమ నత తాల్వభౌభౌభౌమ నత తాల్వభౌభౌభౌభౌభౌమ నత తాల్వభౌభౌభౌభౌభౌభౌభౌభౌభౌభౌమ
నేనెవలు ?

Sravya V చెప్పారు...

హ హ ఎవరికండి మీరు మేధావి కాదు అనేంత ధైర్యం ??? అసలు గంటల పంచాంగం కి సమీక్ష ఏమి ఐడియా మాస్టారు :)))

జలతారు వెన్నెల చెప్పారు...

అయితే మీరు సమీక్షలు రాస్తారన మాట!

sandeep చెప్పారు...

కెవ్వ్ కేక నా సామి రంగా కెవ్వ్ కేకా

మీరు మేధావి కానన్నవాడిని మేకెట్టి పొడుస్తా
అన్నంత రేంజ్ లో వార్నింగ్ ఇస్తే మీరు
మేధావి కాదనక చస్తామా గురువుగారూ..
మీరు 100% మేధావి ఓ కే నా ;);)

శ్రీధర్. దు చెప్పారు...

:)) Panchangam gurinchina review bavundandi.

ఇపా చెప్పారు...

మా మ్రేధావుల సంగం కి ష్వాగతం పల్కుతూ, తవరకు యీ కయిత అంకుతం

ఇపా చెప్పారు...

మా మ్రేధావుల సంగం కి ష్వాగతం పల్కుతూ, తవరకు యీ కయిత అంకుతం
http://www.eemaata.com/em/issues/201205/1955.html

కయిత

బులుసు సుబ్రహ్మణ్యం చెప్పారు...

అనానిమస్ గారికి,
ధన్యవాదాలు. వెంటనే కొనండి పంచాగం. విందు భోజన, వినోద కార్యక్రమ ప్రాప్తిరస్తు.

కష్టే ఫలే గారికి,
భలేవారే. గంటల పంచాంగం అమ్మకాలు పెరిగిపోతున్నాయి. ధన్యవాదాలు మీరు కెవ్వు మన్నందుకు. ....దహా

మాలాకుమార్ గారికి,
ధన్యవాదాలు. అవును నేను మేదావినే ......దహా.

Ruth గారికి,
సినిమాలు చూడకుండా సమీక్షలే చదివి ఆనందించే వారు. తినకుండా నెమరు వేయడం అలవాటు అయిన వారని అర్ధం .
మీరు ఒకటో ఆరో సమీక్షలు వ్రాసారు కాబట్టి మేధావులు కిందే లెఖ్ఖ. ధన్యవాదాలు మీ వ్యాఖ్యలకి.

బులుసు సుబ్రహ్మణ్యం చెప్పారు...

anrd గారికి,
ధన్యవాదాలు ఒప్పుకున్నందుకు.

బుద్ధ మురళి గారికి,

థీరీ యే కాదు కొంత ప్రాక్టికల్ నాలెడ్జ్ కూడా ఉండాలండి. ధన్యవాదాలు.

అనగనగా ఒక కుర్రాడు గారికి,

బ్లాగు చరిత్ర లో ఒక రికార్డ్ నాకు కట్టబెట్టినందుకు ధన్యవాదాలు.

మోహన వంశి గారికి,

మీ అందరి ప్రోత్సాహం చూస్తుంటే సమయ సూచి పై కూడా సమీక్ష వ్రాయాలని ఉత్సాహం కలిగిపోతోంది. ధన్యవాదాలు.

రసజ్ఞ గారికి,

ప్రభావతి మేధావి కాబట్టే ప్రద్యుమ్నుడికి కళ్ళెం వేసి ఉంచింది....... దహా
ధన్యవాదాలు.

బులుసు సుబ్రహ్మణ్యం చెప్పారు...

శంకర్ S గారికి ,

మొదట ఎక్కాల పుస్తకం మీదే వ్రాద్దామనుకున్నాను కానీ రెండు ఒకట్ల రెండు తరువాత మరేమి రావు అని గుర్తుకొచ్చి మానేసాను. ధన్యవాదాలు.

హరేఫాల గారికి,

చేశా ఎక్స్పెక్ట్ చేశా మీరీ మాట అంటారని. బలవంతానైన మీ చేత ఒప్పించాను చూసారా మరి. ధన్యవాదాలు.

రంజిత్ గారికి,

ధన్యవాదాలు.

అనానిమస్ గారికి,

ఇంతకీ మీరు నన్ను మేధావులు అన్నారా మేతావులు అన్నారా ? మేతని నెమరు వేసే ఆవులు అని అర్ధం అట. ఎవరో చెప్పిన దాన్ని మళ్ళి చెప్పేవారు అని తాత్పర్యం.......దహా.

బులుసు సుబ్రహ్మణ్యం చెప్పారు...

పురాణపండ ఫణి గారికి,

అయ్యబాబోయ్, అలాంటి ఉద్దేశ్యం కాదండి. నిజంగానే సరదాగానే వ్రాసాను. ఎవరిని ఉద్దేశించి కాదని మరోమారు మనవి చేసుకుంటున్నాను. ధన్యవాదాలు.

పద్మార్పిత గారికి,

మహా ధన్యవాదాలు......... దహా.

అనానిమస్ గారికి,

మీరు నిజంగా గురువును మించిన చిచ్యుడే. ఒకే కామెంటు ని ఆరు మాట్లు పెట్టేరంటే గుగ్గురువులకి గురువుగారే. మీరెవరో మీరే చెప్పుకోవాలి. నా ఊహ కందటం లేదు. ధన్యవాదాలు.

శ్రావ్య గారికి,

ధన్యవాదాలు. కొంప తీసి, మేధావులు కాదు కానీ అనే ధైర్యం లేదు అంటారా ? ......దహా.

బులుసు సుబ్రహ్మణ్యం చెప్పారు...

జలతారు వెన్నెల గారికి,

రామాయణం అంతా విని మళ్ళి అదేం ప్రశ్న అండి? అవును ధైర్యం చేసి వ్రాసాను. మళ్ళి మరొకటి వ్రాయనని హామీ ఇస్తున్నాను.......దహా.
ధన్యవాదాలు.

సందీప్ గారికి,

ధన్యవాదాలు. ఓకే ఓకే. ఒప్పుకున్నారు కదా పరమానందం.

శ్రీ గారికి,

ధన్యవాదాలు.

ఇషా గారికి,

ధన్యవాదాలు. కవిత బాగుందండి. మీరు వ్రాసినదేనా?

Advaitha Aanandam చెప్పారు...

మీ పోస్టులన్నీ ఓపికగా చదివి కామెంట్లు రాస్తున్న మేము అందరమూ మేధావులమే......

ఇహ సరే రాసిన మీరు కూడా మేధవులే లెండి..... దహా.

మానస.. చెప్పారు...

:) బాగుంది...
మీరు నిజానికి మహా మేధావులే....!!!

అజ్ఞాత చెప్పారు...

గులువుగాలూ,
మీలు మేతావు కాదు, మేతావే
లేకపోతే నాకు గులువుగాలెలా అవుతాలు ?
మీలు అన్నీ కనిపెత్తాలు కానీ
నా ప్లస్నకి జవాబు మాత్లం చెప్పలేకపోయాలు
నేనెవలు ?
మీకు క్లూలు కావాలంతే ఇత్తాను
నేను ఎన్నో చిత్లలాజములలో నతించితిని
దాలావాయికలలో నతించితిని
ఎన్నో పాతలు రాచితిని
ఎన్నెన్నో మాతలు రాచితిని
ఇంకెన్నో చిత్లములు గీచితిని
ఎందలెందలో అభిమానుల మనచు దోచితిని
నా బిలుదు పౌలానిక బ్లమ్మ
ఎవలిచ్చాలో తెలుతా ?
నాకు బిలుదులు ఇచ్చేంత మొనగాడెక్కడున్నాడు ?
ఎక్కడా లేడు
అందుకే నాకీ బిలుదును
నేనే ఇచ్చుకున్నాను
ఇత్లు
మీ తిత్యుడు
తుమన్ మాత్లం కాదు.

బులుసు సుబ్రహ్మణ్యం చెప్పారు...

మాధవి గారికి,
మీరు మేధావులు అని ఒప్పుకుంటే నేను మేధావిని అని మీరు ఒప్పుకుంటారా?

సరే అల్లాగే కానివ్వండి. ధన్యవాదాలు.


మానస గారికి,
ధన్యవాదాలు.

అనానిమస్ గారికి,
పొడుపు కధలు నాకు బొత్తిగా తెలియవండి. మీరెవరో నేను కనిపెట్టలేను. మీ పరిచయ భాగ్యం కలిగించండి. ధన్యవాదాలు.

అజ్ఞాత చెప్పారు...

గురువుగారూ
నేనండీ బాబూ
మీ సుమనుణ్ణి
నాలాంటి సుమనోహరుణ్ణే గుర్తించకపోతే ఎలా చెప్పండి.
ఇట్లు
కథ మాటలు పాటలు బొమ్మలు సంగీతం చిత్రానువాదం దర్శకత్వం
నట శేఖరఖరఖరఖర.., కరకరకర.., పరపరపరల పరంపర.., సుమన్ !
కొత్తగా బ్లాగుల్లోకి రావాలనుకుంటున్నాను.
ఎలా రావాలో తెలియడం లేదు.
దయచేసి దారి చూపించగలరు.

..nagarjuna.. చెప్పారు...

మీరు మేధావి కాదన్నవారిని కపితిచ్చుకు కొడతాను గురూగారు. బస్తీమే సవాల్ అనండి, ఎవరెదురొస్తారో చూస్తాను ;)

@శంకర్ గారుః ఆ ఎక్కాల సమీక్షేదో తొందరగా రాసేయండి. మనవాళ్ళు ఎంత గ్రేటొ ప్రపంచానికి చాటి చెప్పాలని ఎన్నాళ్లుగానో ఉవ్విళ్లూరుతున్నాను.

మనోజ్ఞ చెప్పారు...

ఓహో అదా సంగతి ఏంటిరా నన్ను దుర్ముహూర్తాలూ, వర్జ్యాలూ అన్ని పట్టుకుని పీడిస్తున్నాయి అనుకుంటున్నాను...ఇదా సంగతి, మీ బ్లాగ్ చదవకపోవడమా కారణం. హమ్మయ్య ఇక నేను బతికిపోయాను. సుబ్రహ్మణ్యం గారూ శుభాకాంక్షలండీ, మేధాని అయినందుకు. అయినా మీ పిచ్చిగానీ(క్షమించాలి ఇలా అన్నందుకు) మీరు మేధాని కాకపోవడం ఏమిటండీ. ఇంత తెలివిగా పంచాగం సమీక్ష ఎవరు రాయగలరు ఒక్క మీరు తప్ప. మీ గురించి మాకు ఎప్పుడో తెలుసు బయటకు చెప్పలేదు అంతే. మా తప్పును మన్నించి....ఆ పంచాంగాన్ని పక్కపపెట్టేయండి.

బులుసు సుబ్రహ్మణ్యం చెప్పారు...

అనానిమస్ గారికి,

నమస్కారం. నేను ఓడిపోయాను. మీరే చెప్పండి.
ధన్యవాదాలు.

నాగార్జున గారికి,

మీ కపితలు రెండు నాకూ పంపండి. ఎందుకైనా పనికి వస్తాయి...............దహా.
నేనూ తొడ గొట్టేను. ప్యాంటు బిగుతయింది అంతే.
ధన్యవాదాలు.

మనోజ్ఞ గారికి,

ధన్యవాదాలు మేధావిని అని ఒప్పుకున్నందుకు. కానీ మరో సమీకరణం తో పిచ్చి అని కూడా తేల్చేసినట్టున్నారు కదా. .............. దహా.

y.v.ramana చెప్పారు...

ఎవుర్రా అది! సుబ్బరమణ్యం బాబుని మేధావి కాదనేది? నాయళ్ళలారా! నా ముందొచ్చి అనండి బే! పుచ్చె పగిలిపోద్ది!

(సుబ్బరమణ్యమన్నా! ఇంతకీ మేధావంటే ఏందీ? అన్నా! నాతో కలుపుకుని మొత్తం నలుగురు. నాలుగు బిర్యానీ పేకెట్లు, నాలుగు క్వార్టర్లు మందు రెడీయేనా అన్నా!)

బులుసు సుబ్రహ్మణ్యం చెప్పారు...

రమణ గారికి,

ఓ అలాగలాగే, కానీ మీరొక్కరే కనిపిస్తున్నారు. మిగతా వారేరి?

అయినా మేధావి అంటే తెలిస్తే ఇంత పెద్ద టపా ఎందుకు వేస్తాను?

ధన్యవాదాలు మీ వ్యాఖ్యలకి.

Srika చెప్పారు...

navvitey navvandi aney comment kannaa "navvakundaa undandi veelaitey..." anedi more apt for this Blog...Ikapotey Subrahmanyam gaari medhaavitanam gurinchi endaroo medhaavulu varninchaaru kaabatti nenu kottagaa vivarinchedi emee ledu...Simply superb...

Siva Maganti చెప్పారు...

మీరు మెధావే కదు, మహ మెధావి.
ఒక్క పొస్టు తొ లొపల ఎక్కదొ దాక్కున్న నవ్వుని కట్టలు తెంచుకునెటట్లు చెసారు.

విన్నకోట నరసింహా రావు చెప్పారు...

// “వివాహమునకు సాధారణం గా స్త్రీ రత్నమునకు ఏ ముహుర్తమైనా సుముహుర్తమే, పురుషరాయికి ఏ ముహుర్తమైనను దుర్ముహుర్తమే. “ //

ఇటువంటి అద్భుతమైన సిట్ట్-మెంట్ తయారు చేసిన మీరు కాక మరెవరు సర్ మేధావి. సందేహమే లేదు 👍.

sarma చెప్పారు...

టపా నాటికి నేటికీ కూడా నిత్య నూతనమే సుమండీ :) కేక...:)

బులుసు సుబ్రహ్మణ్యం చెప్పారు...

శివ మాగంటి గారికి. ........ ధన్యవాదాలు. మీరందరూ నవ్వుతూ ఉండాలనే నా ఆకాంక్ష. ........ మహా

విన్నకోట నరసింహా రావు గారికి. ......... ధన్యవాదాలు. ఏమిటో 'సిట్ట్-మెంట్' అన్నారు. ఇందులో తిరకాసు ఏమీ లేదు కదా. .......... మహా

శర్మ గారికి. ........ ధన్యవాదాలు. కొత్తవి వ్రాయలేక పాతవే తిరిగి వేస్తున్నాను. .... మహా

విన్నకోట నరసింహా రావు చెప్పారు...

// “ సిట్ట్-మెంట్' అన్నారు. ఇందులో తిరకాసు ఏమీ లేదు కదా.” //

ఎంత మాత్రం తిరకాసు లేదు సుబ్రహ్మణ్యం గారూ 🙂. టైపింగ్ మిస్టేక్. చూసుకోకుండా “పబ్లిష్” బొత్తాం నొక్కెయ్యడం వల్లనూ.
చింపులూ 🙂. ఎనీవే, సారీ.

విన్నకోట నరసింహా రావు చెప్పారు...

అన్నట్లు, ఆ ఆంగ్ల పదం స్టేట్-మెంట్ statement అండీ .... మ.హా.

హరేఫల చెప్పారు...

అయితే ఏమంటారూ? ఓ శాలువా, ఓ పుంజీడు గంటల పంచాంగాలూ మిగిలాయంతారు..

ఓ పని చేయండి, యూట్యూబ్ లో ఓ చానెల్ పెట్టుకుని, వార, పక్ష, మాస రాశిఫలాలు చెప్పేస్తే సరి .. వచ్చేది సంవత్సరాది కాబట్టి, సంవత్సర ఫలాలు బోనస్ గా చెప్పేయండి మాస్టారూ...

బులుసు సుబ్రహ్మణ్యం చెప్పారు...

హరేఫల గారికి ............ ధన్యవాదాలు. యూ ట్యూబ్ లో చానల్ పెడితే ఫ్రీ గా జాతకం చెప్పాలేమో? ఫ్రీ సర్వీస్ చేస్తే మనకి ఉపయోగం లేదు కదా. పే చానల్ గా మారిస్తే ఇతర సమస్యలు వస్తాయేమో? ముందుగా మీ తోటే మొదలు పెడతాను. ఒక ఐదు వందల రూపాయిలు నా అకౌంట్ కి పంపండి, మీ వివరాలు కూడా పంపండి. ప్రయత్నిస్తాను. .......... మహా